يالضلع ابو رجمين مبروك وسعيد = عادت عليك اعيادنا طيب جاوي

ياضلع تزهانا من الحيد للحيد = ويزهاك منا طيبنا والعزاوي

ياضلع دونك سربة من بني زيد = منتب على حاجة سواليف راوي

جبو ينقص فالسواليف ويزيد = يضبح ويضبح له ثلاثين واوي

محازم فيها قفوش العباريد = ما توصل الضميان عد رهاوي

يسوقني سمي واكم القواصيد = واصبح على الكذاب نجم سماوي

انا عرفت الناقه اللي بلا قيد = اللي جلبها داخل السوق شاوي

يبغى الثمن فيها من الناس تمجيد = ومن القهر يدفع عليها رشاوي

ولافاد منها غير سود المناقيد = تقصر يدينه عن دلال القهاوي

ما مره الفنجال بين الاواليد = يلوي يده دون المواجيب لاوي

اتلى الزمن تبغى العقيمه مواليد = اول زمن واخر زمان متساوي

ياهيه شفتك فالسهل تذرع البيد = لك عام وانت مضيعتك الهقاوي

ماباد مجهودك ولافدت لك فيد = تصبح فلس وتبات ليلك خلاوي

موجات بثك حددوها الرواصيد = غاوي ومن صدق دعايتك غاوي

وموجات بثي فيك من دون تحديد = تبلش بها حتى شيوخ الفتاوي

يامفسرين احلام وضحان وعبيد = وش رايكم في اللي يسوي ملاوي

بشار هو ويا حسن جابوا العيد = حطوا لهم قصه وصيت ونخاوي

خمسه مع الجره وخمسه ملابيد = واحد من الحره وواحد حساوي

لوكثرت الديبان عند المواريد = حول على الديبان صل إشعراوي