دنيا تبذ الخفى واللي يصاليها = ماهيب مني بنو الخير مذكوره
احدِ ربح كدته واحدِ خسر فيها = واحد تجيله مثل لعابة الكوره
يشوتها مقفيه والله يقديها = لو كان نفسه على النوهات مقصوره
أركض نهاري وليلي مجهدِ فيها = والرجل ماينفعه جهده ولا شوره
أحد قصر دونها واحد متعديها = واحد تجيله وهي ماهي بمشكوره
رجل بلا حظ ما يقدر يصغيها = لو حط فيها خزام و معه باكوره
وهايب من ولي العرش يعطيها = ماهيب تاتي لاحد ياكود ماموره
والله يخارج من اولها و تاليها = والرابح اللي له الزلات مغفوره

عندي لكم يا اهل المراجل تذاكير = علم إليا قلته يوقع قراره
صلوا و صوموا وافعلو نية الخير = وترى زكاة المال راس الطهاره
واخذوا بناتِ شقر واقنوا مغاتير = والا حياة الرجل تحسب خساره
حتيش لو انه زرع له على بير = وحتيش لو انه بنى له عماره
وحتيش لو انه جمع له دنانير = العمر مقفي بين ليل و نهاره
يرزقكم اللي يرزق الذر و الطير = اللي رزق حجرف ودابه بـ غاره
هذا كلامي به معرفه و تفكير = وكلِ على كيفه يدور خياره

الله يرحمه ويغفر له



و هناك الله بالايمان



ولا تقاطع تعال تصفح باقي القصيد

يامير نبعث لك كثير السلامي = سلامِ احلى من لبن كل مرزام
اهديه يا نايف لكم باحترامي = يابن الامام اللي بنا صرح الاسلام
يانايف النايف ملاذ الكرامي = اللي مماشيهم على الطيب قدام
ايجون لك من كل فجِ ضوامي = و الكل منهم يبتهج رافع الهام
يامير انا لي فوق خمسين عامي = اتعبت حالي و اقشر الحظ ماقام
الدين عيفني لذيذ المنامي = حلو الكرى حارب عيوني من العام
صبرت لين الحز وصل العظامي = وزبنت جالك ياذرا كل منظام
انتم مقومت الهزيل الهلامي = وانتم مغذيت الكواهل و الايتام
وانتم منحتوني بليا وهامي = بوامرن تمشي على الخاص و العام
(........) رجعه باهتمامي = هو مادرى انه خادم ضمن خدام
يقول سنك فاق سن النظامي = والكسب فاتك وانت عايش بالاحلام
قلت النظام ان كان دونه تحامي = اللي يسنونه هل السيف لطام
يا حر ياللي ماكره بالزوامي = عدل المناكب ابرق الريش صرام
انتم هل المعروف واهل الكمامي = ارجوك تلحق صادر العلم باعلام
لعل تسلم يارفيع المقامي = ذخر لمثلي عن صواديف الايام
وختامها مني صلاة وسلامي = على النبي الهاشمي خير الانام

ياهل الوضح لا تقربون سعود = ماش بوش يحصَل مثل بوشه
كلها نسل ونقوِ عليه اشهود = ماتعرف الشريطي ولا حوشه
يوم يزفر جملها تقول ارعود = تجتمع فوق راسه تقل هوشه
منوت اللي يزاعم عرب واورود = من سطرها توطاه مدهوشه
ما تلاها اسود الوجه والا هنود = تعرف الصوت ماهيب محيوشه
الشمالي على قعدته ما جود = ماتميز جبينه من رموشه
يوم يثغب لها ثغبةِ بركود = ترتهج يوم يومي بقرقوشه
في هواها مشو وابدو المجهود = ترتع القفر واتذير اوحوشه
شفهم بالتمشيه وتبع القود = واتركو فلة القصر مفروشه
تفرح الصدر لا يومنا الماعود وراعي البنك يرجن على قروشه
كيف يجمع وهو خابره مفقود = وقدمه القبر تركز له افروشه
النفس تصعد وباقي اللحم للدود = مالين حق عينه ونخشوشه
الموت مامنه فكه ولا مردود = كل يومِ وهي تلفي اطروشه
مايخلي مك ولو هو ابن سعود = والعذارى بعد باول الطوشه
والمراجل كسبها سعد و سعود = يوم خطوى الولد تقصر انطوشه
حصلوها اسودِ عيال اوسود = شارة الطيب بالوجه منقوشه
طيبهم من قديمِ وورث جدود = يومِ الصفر يلفض بناتوشه
جاهم الحاكم الشمري بجنود = ماحصل ياصل المال وينوشه
اعتزوا ولد حافي عيال العود = واكسروا بيرقه هو وشايوشه
وجا نهارِ يشيب به المالود = من حضر هيته شابت ارموشه
هيت انطاق تذكر عليها اشهود = بالتواريخ ماهيب مخشوشه

يا ابن عقيل ياذرى كل محتاج = ذريتني يوم السمايم كلني
كم واحدِ من سبتك ذاق الافراج = امسهلِ دعواه من دون مني
بياض وجهك كل ما اصبحت ينباج = بافعالك اللي بالوفاء يعجبني
يا شوق من قرنه على المتن دلاج = اشقر على ناب الردوف امتثني
وخدِ كما برق من الوسم لعاج = بارق حياء بخشوم مزنِ سرني
والعين عين اللي بكبد السماء راج = طالع خروب الصيد يوم ادرجني
والعنق عنق اغزيلِ بالخلاء داج = متذيرِ يوم الخشوف اجفلني
انته عمود البيت مانته بمنعاج = وفيت يومِ اليدين اقصرني
كم واحدِ بالهرج جيد ولجاج = راحت اهروجه بوش ماينفعني
انت الذي جالك على الصدق منهاج = بانت براهين العلوم وزكني
(( .........)) وجهه اسود من الصاج = متجهدِ في قطعة الرزق عني
وصلاة ربي عد ماطاف حجاج = على محمد عد ورقِ يغني

نبدا بذكر الله قبل كل اجابه = الواحد اللي خالقِ كل ما كان
قال الجريس من مثايل جوابه = مثايلِ يطرب لها كل ديقان
وردت لي عدِ قراح شرابه = جمه غزير و يارده كل عطشان
عدِ بجوِ شامخات هضابه = هضاب فعل الطيب مهيب ظلعان
وقصرِ مشيد مابعد صك بابه = مدهال لطوال الشوارب والايمان
اللي يجي يامرحبا وسهلا به = مبذولةِ للضيف من قلب و لسان
ان شفت بيته قلت عنده اقصابه = من كثر مايذبح من البل و الضان
و العود الازرق غاديِ له ضبابه = وبريةِ وبهارها سبعة الوان
هذا يحمس البن وهذا مشا به = وهذا يصبه من مباهير رسلان
حمود الجهيمي يوم ابا الجود جابه = ماخابت امه يوم جابت كحيلان
جليس حكام بعرف و لبابه = مايطلع الكلمه الا عقب ميزان
ميزانها في مخ راسه حسابه = لا زايدِ زود ولا فيه نقصان
ربي عطاه العرف عطوى وهابه = وهابةِ مهيب تشرى بالاثمان
وجده وابوه معربين نسابه = معربينه من عناتيت قحطان
من طيب حظه كل حيِ درا به = درو به اهل الشرق والغرب و عمان
واللي بنجران الجنوبي حكى به = مشهور مثل سهيل في كل الاوطان
ابو فهد حلاَل عقد النشابه = بالجاه والا المال ماقال خسران
شيال حمل المنقطع مع زهابه = شال الثليثي مع ثقيلات الامنان
وصلوا على اللي دين ربه سعا به = محمد المذكور في سر و اعلان

يقول من يبدع الامثال = مشتاق ماهوب طماعي
يالبيض شومي لابن هلال = يا مخضبة روس الاصباعي
ابو فهد وافي الافعال = يخض له الشيخ و الراعي
ضافِ جميله على اهل المال = خلاه بالعشب شراعي
عشبِ نباته ثمان اشكال = و زهور من كل الانواعي
من شاف عشبه فرح و اهتال = يقول ذا زرع زراعي
نرعه بظله وهو بظلال = في ظل وافين الابواعي
حكامنا يشرحون البال = لا صار للحرب زعزاعي
حكامنا مضرب الامثال = و المدح في غيرهم ضاعي
فهد زعيم العرب حلال = صعب الشرابيك مناعي
وولي عهده وسيع البال = نشري بظله ونبتاعي
سلطان ياريس الابطال = صعصاع ياوي صعصاعي
ونايف جبل من طوال جبال = ماينتزعزع و ينزاعي

سبعة شهورِ وبوشنا يرعى الربيع = في ديرة الاجناب ماحدن ردها
نمشي بقطعانِ يصكن كل ريع = وان جت توالي الشمس عنهم سدها
تعدت الاولاج و الخط السريع = لين سوريا وصلنا حدها
اللي حضر من روق تسعمية قطيع = وباقي القبايل ماقطبنا عدها
يمشي بها ناصر وهي بامره تطيع = ياهني قومِ شيخها من بدها
ضياغمه رجالهم صدره وسيع = زودِ على ذلك وسيعِ سدها
الجار هو والضيف بالعال الرفيع = خيرِ لمن معها وشرِ لضدها
جميع من له حق يثبت مايضيع = و الناس ماتظلم وتعطى قدها
نرعى بظل اللي لهم حلمِ وسيع = ابو فهد جاب الخبر من قدها
في ظل حكامِ لنا غيث و ربيع = عنا اليدين الطايلات تردها
فهد و عبد الله و سلطان الشجيع = مثل السيوف اللي وريعن حدها
وفهد مليك المملكه ابو الجميع = مالك عروبتنا من اقصى حدها
حامي حرم مكه وكلِ له مطيع = وان جا المدينه مفسدين يردها
بالله ثم بقوةِ تدع الرضيع = يشيب لو هو بالديوس يشدها
قوات دولتنا هل الباس الرفيع = لو وجهت فوق الجبال تهدها
ليته يوجهها على الوجه الشنيع = لينن عمايرها تساوي خدها
يازين طرح جنودهم مثل الصريع = تروح ليا هب الهواء من قدها
عدوانك اللي عندهم راي بديع = قبل تبدى فيك عجل بدها
الله يعلي كلمته وهو السميع = نرفع يدينا للسماء ونمدها
يالله يالمطلوب يارب الجميع = تقبل دعاة المسلمين لضدها
هذا الكلام وغير هذا ما استطيع = دنيا ندافعها وهي لا بدها
والخاتمه صلوا على الهادي الشفيع = شفيع الامه يوم كلن ردها

يا حيف بعض العرب يا حيف = يقني من البوش ويبابي
محرومه ما تذوق الريف = مرباعها الحوش والبابي
ومرباعنا في يمين طريف = ونخوض بديار الاجنابي
كلنا ربيعه واكلنا الصيف = والحد ماعنه مجنابي
نمشي بوضحِ يهيفن هيف = نسع الغوارب و الارقابي
البل سمنت وزان الكيف = زود الشحم فوقها نابي
مع درب ناصر نخوض الريف = من نسل وافين الاشنابي
اللي لهم بالوفا توصيف = توصيف ابو زيد و ذيابي
عاداتهم يكرمون الضيف = و الجار يكرم و ينهابي
من دونهم يثلمون السيف = بالفعل لا كشر النابي
هذا كلام من الحريف = يدري بما بان و الغابي

أبو محمد يسد بغيبتي عني = لا جاه نشاد عني حط ماجوبه
يستاهل الطيبه غصب بلا مني = اللي شقا بالكرم والطيب ودروبه
ترى المراجل ماهي بضحكة السني = بالبن الاشقر وكبشن تنثر اعصوبه
بعض العرب مرزقه واجد و غابني = ودك يقسم على اللي ما تهقوو به
باكر ليا مات طار بمرزقه جني = ماقيل مرحوم والوراث طارو به