بديت و لا بديت الله يجيب اللي على بالي= على بالي علومٍ لا اتناساها و لا اذكرها
و اضيق و تنحني كل الضلوع و تقتل آمالي= و احفر قبورها ثم استخير الله و لا اقبرها
أعيش الذكريات و صورة الماضي تورّى لي= أطوّل خطوة الماضي و تتعبني و اقصّرها
سنين العمر مرّت يوم مرتني على الخالي= تذوب عروق قلبي كلها يوم اتصورها
سنينٍ عشتها فيها ليالٍ ياهي اليالي=عسى الله يجعل اجري بالذنوب اللي يكفّرها
و الى منّي تذكّرت الغرام اللي برى حالي= أقول الله يعين اهل الهوى و الله يصبّرها