لا ضاق صدري ركبت اللي على كيفي = واعرف ادروب الخلا مانيب غاويها
نمشي مع النبت نبت الوسم والصيفي = مع درب وضحِ تلوج لصوت راعيها
وضحِ على ندهة الراعي مواليفي = ماهيب ملحِ قبل ضرب العصا فيها
العفر طفقات ماتصبر على الحيفي = ماهيب ملحِ دلوه بشبك راعيها
يبغن لهن واحدِ من سيف الى سيفي = يتبع هواها ويمشي في مشاهيها
والبل عاداتها فرقا المواليفي = ماهوب يقعد مع الخفرات راعيها
الا ان حصل صاحبِ زين العجاريفي = عمهوجةِ طيبه من ساس الظفر فيها
ماتقبل القصر وحجرة المجاييفي = والحجره اللي يلمون الخزا فيها
تحب ممشا العذا وارضِ قراقيفي = ليا طبت الروض ريح الروض يحييها
وتوسع الصدر في مبدا المشاريفي = وتبرح نظرها مدام الله معافيها
منبوزة الردف ضامرة السراجيفي = ماتاكل الخبز لو حطوه بيديها
ماتشرب الا لبن وضحِ مشاعيفي = متيهاتِ ينوس القفر راعيها
هذا هوا خاطري فكري و تصنيفي = والناس مانيب بافكاري مقديها
الملح : الملح هنا يقصد بها الابل المجاهيم ( سوداء اللون )
الحجره اللي يلمون الخزا فيها : هنا يقصد به ( الحمام - دورة المياه ) تكرمون
.