لي فاطرن حنت على حنت الظير = ومن كثر ما والفتهن والفنا
والله ما اطاوع بك كثير الاشاوير = واللي يقولون اقلع البل عنا
نبيه لياجا في ليال المحادير = واليا انهن في مشيهن يطربنا
واليا لقينا خايعن به نواوير = جينا على حد الدماث ونزلنا
مزخرفه ربي ويسجع به الطير = وفيه الزبيدي تو ماصلعنا
والسيل نقع وفيه عشبِ مكابير = تشبع به الفاطر ولو هي تثنا
والتمت البدوان معنا على خير = وقامت تخابط فيه مناومنا
ونشوف خدرات العيون السحاحير = اللي بنجل عيونهن يسحرنا
نجل العيون تخدر القلب تخدير = وتطرق برمشِ تسلب العقل منا
احدن نزل في قصر واحدن زرع بير = واحدن بدكانه رجلينه تثنا
واحدن يرفع ربعته للمسايير = ويفرح اليامن الجيوب اقبلنا
اليا وقفوا واليا دلاله مباهير = وقولت هلا واهلين من دون منا
ومن عقبها تقليط كبشِ على مير = هذي عوايدنا وعادات اهلنا
هذا هوا بالي والا لي هوآ غير = وكلن عساه بما يريد يتهنا