ما اهبلك ياللي تبغي الذود مني = والله ما ابيعك لو تزود الثمن فيه
انا معاهدهن وهن عاهدني = لا بايعن ذودي ولانيب مهديه
قلبي موالفهن وهن والفني = ولايستوي للذود ياكود راعيه
اترك هواي وتابعن شفهني = وارض العراق وسوريا ربعن فيه
ماهن من اللي بالشبوك ادخلني = ولاقيدت بعض المهابيل رجليه
يبي يطوعهن لجل يحلبني = ماهمه الا ملي بطنه ومافيه
مستاسعِ صدره وهن يرزمني = دايم موازيهن عسى الله يوازيه
ذودي اليامن المزون حدرني = وقالو لي الصمان عشبه مغطيه
وتليمن كل الطروش و مشني = كل يبي المحدار والعتش معطيه
واليا انهن قدامهن يقدعني = يشدن لصيدِ مفلسِ منه راميه
واليا ندهت مشوعه وتبعني = يشدن لطابورِ مشى ضابطه فيه
يمشن مثل ممشاي ويوقفني = الماقف اللي ناقفه ياقفن فيه
واليا عطيت الريع ثم ظهرني = وبانت مفارعها واليا ويش احليه
يشدن بنات ملوك إليا فرعني = لاجا نهار العيد ثم ارقصن فيه
ولا فيه شيِ في الحياه يغبني = ياكود بنت شفها شف راعيه
ودي إليا منه دنا الموت مني = باحدن يعزيها وهي تفتهم فيه
وانا عزاي إليا قبرت ووطني = وصابر على مقسوم ربي وراضيه
ندهت مشوعه : ناديت مشوعه .. ومشوعه اسم لاحدى نياق الشاعر
.