ديوان الشاعر سعد بن جريس رحمه الله

ماهب لك ياباغي من العفر مخلاس = العفر ما تعرض على اللي يخلصون
ما شن يجيب العفر كود ابيض الماس = والا الذهب بيدين ناسِ يسومون
كم واحدِ من دونهن يشرب الكاس = وان مات عند نحورهن قال ممنون
ياما قطع دون المغاتير من راس = الشاهد الله والمخاليق يدرون
ان جا نهارن فيه تجديع الالباس = وقاموا على حياض المنايا يحومون
لاصار فيهم مثل مسلط و عفاس = ومحمد بن حميد ياللي تعرفون
مدور الطمعات يبشر بالافلاس = ويصبح عليه صغار بيته ينوحون
والله ما ابيعهن برقه وقرطاس = يكود قلبي يختلف واصير مجنون
ماعاد يلحقني ملامِ من الناس = ارضى بحكم الله وهم لابد يرضون

كم واحد من دونهن يشرب الكاس : المقصود هنا كاس الموت


لاصار فيهم مثل مسلط و عفاس : مسلط و عفاس احد مشاهير فرسان عتيبه وشيوخهم وهم مسلط بن ربيعان وعفاس بن محيا

.

البل ساس المرجله للرجالي = من اول الدنيا الى اخر زمنها
والله ما ابيعهن ولاظن بالي = يبيعها غيري اليا مت عنها
البل خالقهن عزيز الجلالي = ماهيب صنعة كافرِ ما تكنها
البل يرخص دونها كل غالي = حتى الرجال الطيبه من ثمنها
البل سلعة ملحقين التوالي = لا طار عن بيض الصبايا يقنها
كم ابلجِ راسه على الحزم بالي = يارد لحوض الموت ماصد عنها
ماهيب للي يتبعون الظلالي = مهبلِ ماعاد تشرب لبنها
يقول انا حللت دمي و حالي = وقالو حليب النوق نحذرك عنها
يضربك بالحمى وكثر العلالي = اشرب من الصحه وتكفيك عنها

الصحه : قوارير ماء الصحه



.

فاطري ماعاد يلحقني ملامه = موصلك حد العراق من السعودي
دوك عشب الوسم ما فتح كمامه = والمطر يمطر وهو نبته يزودي
كاسيِ الحد غيتور و جهامه = فيهن المغزل وفيهن العمودي
و النعش و المطرقين إلهن علامه = والاهله والحلق فوق الخدودي
والحلق بالفخذ وسم اهل الشهامه = الملوك اللي على عشرة جدودي
وباقي العربان مانقصر مقامه = كل رجلِ غير عرفه مايزودي
موفي حقك على عز وكرامه = ومن غلاك مخلي غض النهودي
يوم ولد اللاش دايم في منامه = راقدِ حظه وهو مثله رقودي
رايغِ قلبه مثل قلب النعامه =ماومن لو هو تحت حكم السعودي
والمره تطرش وترجع بالسلامه = دام للمقرن على الدنيا وجودي
كل رجلِ طيبِ نزل حزامه = هم حمانا عن طموع وعن يهودي

صح لسان الشاعر

وتسلم يمينك ياالخيل متابعين اكمل

قصة هذه القصيده ان بن جريس كان قد اراد ان يشتري بيت قد اعجبه في محافظة الدوادمي وسأل صاحب البيت عن قيمته فقال له صاحب البيت ( ويظهر اسمه في القصيده ) ثمن البيت نياقك يابن جريس



ولكن بن جريس رحمه الله لم يوافق على هذا وقال هذه الابيات :

ان كان ابن مشراب عيا عن البيت = والله لسوي غير بيته عماره
البل ماتنباع ببلك و سميت = بياعها يبشر بغبن و خساره
وان كان بعت البل بالبيت ما اقديت = سوات بياع الفرس بالحماره
البل ساس العز وتبين الصيت = مهوب قصرِ كايرِ به غباره
البل راعية الندا و التصاويت = عزي لبيتِ ما تجيله سماره
وان جا نهارن فيه للشمل تشتيت = كنه مصبحهم مع الصبح غاره
راع الغنم مع دربهم له تشاميت = تلقاه يلعن يوم تربض جفاره
يشرب على درب المغاتير حلتيت = ويذوق من عقب الحلاوي مراره

صح لسان الشاعر

وتسلم يمينك ياالخيل متابعين اكمل

الله يرحم الشاعر


وصح بدنك بالنيابه


وشاكر لك المتابعه والله يقوينا على التكمله

اربع نياقِ عفر تسوى عماره = عندي وعند اهل المراجل و الافكار
ماهيب قصرِ صابغينِ جداره = ينهد اليا حفر ساسه الفار
البل حلوه للي يبون الحضاره = ربعِ تجمعهم على طفية النار
جداه لاصبح شاكين ورع جاره = يقول حاذفني ولا انا بصبار
وهو جداره ناشبِ في جداره = لاهوب يرحل ولا عنه مظهار
بيت الشعر راعيه يازين كاره = مغير ياقف بالمنازل ويختار
ان جاز له والا رحل من نهاره = ماله على شين المحلات جبار

لاضاق صدري ركبت ورحت لنياقي = مالي جلاده على المقعاد بالفله
نسوقهن للحياء وان لاح براقي = هزع العراقيب والارقاب منتله
قلبي على شوفهن ولهِ ومشتاقي = مثل المهاوي لاجاه العشق صافِ له
نمشي على دربهن ونفك الارياقي = من در وضحآ لبنها يبري العله
ومقابل القصر من تقطيع الارزاقي = وش ينبغا به وهو جاره عدوِ له

قال هذه الابيات عندما قال له بعض جلسائه ماذا تريد بالابل بعها وارتاح لقد تقدم فيك العمر ولم تعد تستطيع رعايتها فقال :

والله مابيع مشوعه و النعامه = حتيش لو راسي من الكبر شايب
مادامني حيِ واعيش بسلامه = وان مت حطوهن لقبري نصايب
هذا هوا قلبي وهذا غرامه = على قدا والا على غير صايب

مشوعه و النعامه : اسماء نياق من ابل بن جريس وكانت من المحببه اليه


.

كلِ معه شف و نحيره = ما ابغى مكينه ولا رشاش
شفي بسطعة نواويره = عشبِ جديدِ سقاه ارشاش
واللي تطبه مغاتيره = هذاك ربع وخلي اللاش
يقول انا بازين الديره = مابين جمران و النشاش
وقتِ تطارد معاصيره = ويموت من لا قدر ينحاش

ما نطاوع في ابلنا هرج الخبولي = قايمين بحقهن و الواجباتي
يعلفون شعير من حولِ لحولي = والعرب بالحد يرعون النباتي
والعشاير كنهن بالحال حولي = فوقهن مثل الرجوم النايفاتي
واستخفن يوم درهمت الرحولي = والتوالي ينهشن الاولاتي
والفخر للي ينقون الفحولي = مانضرب من بعارين الفلاتي

يا فاطري من نبات الوسم نرعابك = في كل يمه جديد القفر ترعينه
وان جا زمانِ بخيلِ مابخلنابك = والله لعطيك لين انك تخلينه
انتي عزاوي العرب كلن تعزوابك = والحضر فوقك نبات الزرع مسقينه
وانتي منيحة هل الورعان يلقابك = والجار يلقى ومنك الضيف مقرينه
عساه يفداك كل اللي تهزا بك = تاطا سماريك من خده على عينه
ما سبك الا ردي ما تهقوا بك = لو كان يبغيك يدري انك تعسرينه

كريم يابرق جذبنا رفيفه = يمطر على دارِ بعيدِ مداها
البرق لاح وهايفت له منيفه = الله يلحقني هواي و هواها
عاداتها رعي السهال النظيفه = الى اختلط عشب المنابت وماها
ياما حلا لقط الزهر و تخطيفه = وتكظم من الشعبه عليه بجماها
ومن لانجع له في الديار المريفه = هذاك تقمح ناقته لو قناها
لو كان من دونه رمال و حتيفه = نترك هوى انفسنا ونتبع هواها

منيفه : احدى نياق بن جريس


.

البل حنت تبي المحدار = وان عاش راسي لحدرها
لمشي بها من ديار لدار = وعن ديرة الوقت لظهرها
وضحن تكاشف كما الانوار = سبحان ربِ مصورها
نسع الغوارب مهيب قصار = عرب تعارض فقايرها
مغير جلسه وشبة نار = والكيف فاحت مباهرها
افرح ليا جوني الخطار = واليا الغضاير مساطرها
هاتو خبر واخذو الاخبار = وراع الذبيحه يدبرها
اخير من غلة التجار = لو كان بالبنك تجحرها
واخير من راح للامصار = دينه و دنياه دامرها
ترى كلامي لكم تذكار = و الناس ماناب جابرها

الخيل عشقي

رحم الله خآلك و آسكنه فسيح جنآته

آمتعتنآ بهن وآصل وعسآك ع القووووه

مشكور على مجهودك