~ كرسي الإعترآف يستضيف مشرفتنآ السآبقة " أم سعد " آقلطوا لآهنتوا ..}

السلام عليكم ورحمة الله وبركاته
كيفك أم سعد عساك بخير
طبعا انا وعدتك قبل كم يوم ان لي عودة بالأسئلة ولا صدقت إن الأربعاء جاء عشان ارجع واطرح أسئلتي وان شاء الله تجاوبين على أسئلتي وأنتي مرتاحة مو متضايقة من اسلوبي وأكون عليك ضيفة خفيفة<<لأني مررررررررررررة نحيفة هههههههههه
وشكراااا000
موضوع كتبتيه وتحسفتي؟
موضوع مبسوطة انك كتبتيه؟

عضو تقولين له الله يكثر من أمثالك!!

وعضو تقولين له ليت كل الأعضاء مثلك وأخر تقولين له استمر!


من قدوتك في الحياة؟
لمن تشكين همومك؟
حاجه تسعين لها وماتحققت للحين؟

وش تقولين لشخص طاح من عينك لكن ماطاح من قلبك؟

ليش أنتي متشائمه؟وهذا مالاحظناه في كثير من مواضيعك!!
صفه فيك تكرهينها؟

ميزه تميز منتدى الشعراءعن غيره من المنتديات ؟؟

من مواضيعك (سبح رجالية ؛ بشت رجالي،مكياج رجالي)
وش سر اهتمامك بالأزياء الرجاليه؟؟
وماهو الرجل بالنسبة لأم سعد سواء أخ أو أب أو زوج؟؟

السلام عليكم ورحمة الله وبركاته

وعليكم السلام ورحمة الله وبركاته ..

الى الوالدة أم سعد

حياك الله يالابنه

لاني نادرا ماادخل الشعراء او النت عموما بسبب دراستي

الله يعينك ويسهل عليك امـين ..

كيفك أم سعد عساك بخير

بخــير جعلك بخــير..

طبعا انا وعدتك قبل كم يوم ان لي عودة بالأسئلة ولا صدقت إن الأربعاء جاء عشان ارجع واطرح أسئلتي

حياك الله اسئلي وانا بعد ودي اسأل من انتي >>عندي احساس انك تعرفيني معرفه شخصيه

وان شاء الله تجاوبين على أسئلتي وأنتي مرتاحة مو متضايقة من اسلوبي وأكون عليك ضيفة خفيفة<<لأني مررررررررررررة نحيفة هههههههههه

وشكراااا000

لاااا شدعوى..كــل ماتكتبينه زيــن وخــفيف ..

موضوع كتبتيه وتحسفتي؟

كــثير حتى ان ودي معي خاصية الحذف واحذفهم..

موضوع مبسوطة انك كتبتيه؟

مــافيه.. لكــن اي موضوع يستفيد من الاعضاء فائده حقيقيه اكيد يسعدني..
وبالنسبه لي موضوع الاطباق المصوره لانه اذا احتجت طريقة اي حلى ولا شي ادخله ويفتح لي الرابط على طول من غير لااحوس بالقسم وابحث..

عضو تقولين له الله يكثر من أمثالك!!

أم ريـهــام..

وعضو تقولين له ليت كل الأعضاء مثلك

أبـو ربـيع..

وأخر تقولين له استمر!

زيـــنــه..

من قدوتك في الحياة؟

امـي الله يحفظها..مع انها شخـصيه مثاليـه مرررره وانا ما احب المثاليه..

لمن تشكين همومك؟

محــب اشـكي لاحـد..وان اضطريت مافيه أحـن وأقرب لي من امـي ..

حاجه تسعين لها وماتحققت للحين؟

دراســة الــماجسـتير..عــسى الله يحققها لي.. واشياء واجــد..

وش تقولين لشخص طاح من عينك لكن ماطاح من قلبك؟

كـل شخص يطيح من عـيني مايبـقى له مكانه بقلبي..
لكـن مادامك قـلتي ماطاح..اقول انه خـيــب الظن فــيه..ويبقى رصيد الاحتقار اكبر من رصيـد الحب له ..

ليش أنتي متشائمه؟وهذا مالاحظناه في كثير من مواضيعك!!

لأنـــي واقعيه..

صفه فيك تكرهينها؟

قلة الصبر..

ميزه تميز منتدى الشعراءعن غيره من المنتديات ؟؟

ياكــثر الي يميز منتدانا عن باقي المنتديات..
أقــل شي قسـم المطبخ عندنا كله من انشاء اعضائنا وغير منقول وهذا نادراً مانلاقيه في باقي المنتديات حتى الكبيره مره..
يعني على الرغم من قـلة عدد الاعضاء وخاصه البنات الا ان القسم مدهر بمواضيع مميزه والنقل فيه توقف من زمــان.. اجل لو عدد اعضائنا اكثر وفيه بنات كـثير وش بيـصير..!! صراحه كــل القسم على بعضه ممــيز
لدرجــة الي يبي اي شي في الطبخ يقدر يرجع للقــسم ويلقى الي يبي وبالشرح الكامل والخطوات المصوره..

من مواضيعك (سبح رجالية ؛ بشت رجالي،مكياج رجالي)

وش سر اهتمامك بالأزياء الرجاليه؟؟

لا اهــتمـــام ولاشي ..لـكن احب مشاركتـي تكون في قسم يحتاج تحريك..
وقسم الشباب مهجور نوعاً ما من ناحية المواضيع فـأحب اشارك فيه غـير ان مواضيعي فيه تلاقي تفاعل كــبير مره وهذا شـي يشجع..

وماهو الرجل بالنسبة لأم سعد سواء أخ أو أب أو زوج؟؟

أب..هو الصدر الحنون والقلب الرحيـم..هو الامان والجدارن التي تحميني من غدر الزمان والحب الحقيقي والأبدي.هوصانع الرجال ومدرستي في هذه الحياة ..يخوني التعبير صراحه لذالك اقول هو الدنيا بأسرها..
أخ ..هو الحب والاحترام والســند والحمايه والقوه لي في الحـياه ومفخره لي بكل شي.. بدون مبالغه هـو أب ثاني..

نورتي الـموضوع بتواجدك فيه ..وموفقه في دراستك يارب..

ام سعد

^
^
ادري انا غثيناك




طيب



هل انتي راضية عن نفسك وعن ما قدمتيه الى هذه اللحظة ؟؟



برنامجك اليومي ؟؟


هل فيه عمل لازم تسوينه كل يوم يعني شي روتيني ؟؟ ما هو ؟؟ <<<< لقافة

حــياك الله اخــوي ابو ربيــع ..

ام سعد

^
^
ادري انا غثيناك

لااا شدعوى

هل انتي راضية عن نفسك وعن ما قدمتيه الى هذه اللحظة ؟؟

لاااااا ابد غير راضيه.. والله من جد العـمر يروح والسنين تمشي والايام تمر وانا ماسويت شي لالدنيا ولا للاخـره.. مدري متى اتغير..

برنامجك اليومي ؟؟

ماعندي برنامج حياتي فوضويه

هل فيه عمل لازم تسوينه كل يوم يعني شي روتيني ؟؟ ما هو ؟؟ <<<< لقافة

مثل ماقلت انا فوضويه ماعندي شي روتيني ابد ابد..
لكـن اقول قهوة العصر او المغرب هذي روتين يومي مع العائله الكريمه >>عزالله عجوز..الظاهر لو افقده يوم جاني شي..
والكــتابه في دفتري حاجه شبه يوميه>>يومياتي

يالله استعجلو اللي بيسآل آم سعد لآن لها آكثر من شهر .. والحين التاريخ 31 -5

في تاريخ 12 - 6 بقفل الموضوع .. يعني تكون تمت شهرين تجاوب على بثارتكم يالماصلين =( << والله يا احس بيجي بيوم انجلد

^
^
^

احس انك انخرشت عقب موضوع بشار وقمت تدهر <<<<< براااا



ما قصرت يا سري

ههههههههههههههههههههههههههههههههههههههههههه ..


ابو ربيع يا مجنووووووون

الله يرجك ..

ام سعد :

ياخي ما عندي سؤال واسالتي بايخه ..

لكن بسال

^

نااااشب

المهم :

ام سعد ادري ان قاعد بحلقتس .. لاحظي اني داري

س1 / وش ترتيبكـ بين اخوانكـ ؟

س2 / وش شهادتكـ ؟ < مطيفيق

س3 / وش رايتس بالشرقيه ؟ < معليش ترى الكيبورد جديد وقاعد امرنه على الكتابه

وبث .. /

أحّوووول للحين وأنتم تكتبون أسئله

الله يعظم أجرك يا أم سعد ويعينك

ابوربيع وزينه بدون ذب لو سمحتو عندكم سؤال اسألو ..

واللي بيرد عقبي بحذفه << شفتو كيف المشرف النشيط تعلمو

^
^
^
يا انت متسلط على زينه ياعزي لها .. ترى الي ردت عطر مهيب زينه



والله يوم شفت طرف العنوان فوق قلت كرسي جديد ..
من جد عجزت على ذا الكـرسي >>سجن معاد هوب كرسي..


المهم هــذي اجوبتي ..



المهم :

ام سعد ادري ان قاعد بحلقتس .. لاحظي اني داري

هههههههههه وراه ياكافي .. لا بالعكس والله ..

س1 / وش ترتيبكـ بين اخوانكـ ؟

اعــفني ياخيي من الجواب لان مابقى شيً ماقلته ..

س2 / وش شهادتكـ ؟ < مطيفيق

سادسه امــيه

س3 / وش رايتس بالشرقيه ؟ < معليش ترى الكيبورد جديد وقاعد امرنه على الكتابه

تــهـــبل .. واحبــها عــشان اهلها >>اقاربي الي هناك..
ومجمعاتها واسواقهاتهبل >>عزالله .. صارت تنافس وتفوق على الرياض.. وبس



يالله عاد جاوبت على الاسئله والظاهر مابقى شي في حياتي ماقلته ..صكوا الكرسي >>تنفخ على المشرف
واستضيفوا عــضو جديد عشان نستلمه ..


واخـيراً ..
ســبحانك اللهم وبحمدك اشهد ان لا اله الا انت استغفرك واتوب اليك ..

يالله ..

زينه تراني لخبطت من كثر ما انا ادور عليتس شي لزختتس بدال عطر

هههههه ام سعد لاتحجرين ثاني مره

وهذا الكرسي وصكيناه

قومي

قومي

جعلتس اللي منب قايل << بينجلد

يالله عسلآمه واحترونا بكرسين آخر نحجر فيه حدا هاللي يترززون بالمنتدى ~