العمل الجزئي مؤيد ام معارض

بسم الله الرحمن الرحيم

السلام عليكم ورحمة الله وبركاته


العمل الجزئي أو ( part time )

نسمع به في بلاد الغرب ولكن لا نعلم ما هو

وان كنا نعلم ما هو فتطبيقه في مجتمعنا جريمة



واقصد بالعمل الجزئي ذاك الذي يكون في المطاعم والمقاهي وسيارات الأجرة






وهناك محورين للموضوع اود التطرق لهما

اولا : نظرة المجتمع لمن يعمل هذه ال أخي الزائر نعتذر مِنك لا يمكنك مشاهدة الموضوع بالكامل لأنك غير مسّجل ... فقد تم قطع الجزء المتبقي من المحتوى ولِمُتابعة بقية الموضوع يُرجى تسجيل الدخول .
وإن أردت التسجيل
أضغط هنا

	وعليكم السلام ورحمة الله وبركاته ( كتبت لي رد اطول من موضوعك لكن كنت فاتح صفحه ثانيه وبالغلط سويت رجوع للصفحه الي فيها الرد وراح ردي لكن استلم هالرد لعله يكفي مع ان الاول كان اوفى لان الرمح من اول ركزه ) بسم الله نبدأ / وللاسف لم اعمل فيهما لضروف شخصية ومرض امي الله يعافيها الله يشفي والدتك والله يرفعها بالعافيه والله يسهل ضروفك الشخصيه واحتسب الاجر في صبرك لتناله باذن الله . . مقهى في الخبر اسمه اكتوشي او شي زي كذا كنت اروح له دايم واستغربت ان الموظف سعودي سالته قلت هل عندكم وظايف قال اكيد وحنا ما نوظف الا سعودين قلت اجل ما جاكم احد قال بالعكس والله وكل موظفينا من جامعة البترول وجامعة فيصل بس يقول الحين ما احد يجي من السعودين ومتوهقين مع ان راتبهم 2500 ريال طبعا بغيت اتوظف بس قال انك لازم تشغل اغاني في المقهى دايم لانها اجبارية اما اجباريه !! لا حول ولا قوة الا بالله .. شيء محزن ان اسمع مثل هذا في بلاد الحرمين اثرنا غافلين عن اشياء كثيره هنا لا ادعي المثاليه .. فانا استمع للاغاني للاسف ولكن برغبتي ولست مجبرا ويحزنني ان ارى من يتقيد بعادات الغرب ويجعل هناك قرار اجباري لتشغيلها في مقهى لعل هذا هو التطور الذي يتحدثون عنه !! الله يهدينا ويفتح على قلوبنا ونتوب اليه توبة نصوحا اللهم امين . . رحت كنتاكي قالي المصري اكيد نوظفك وراتبك اكثر من 2500 بس لازم تحلق لحيتك علشان الاكل لا حول ولا قوة الا بالله ايجهلون قول النبي صلى الله عليه وسلم ( حفوا الشوارب واكرموا اللحى ) ايضا لا ادعي المثاليه .. فأنا حليق الذقن ولكن يحزنني ان اراه اجباري فمهما كان لنا اخطاء فلنا ايجابيات ولدينا غيره على ديننا مهما كانت العواقب . . كيف تنظر للسعودي الي يشتغل في مطعم او مقهى ؟؟ واتمنى ان الاجابة تكون بعيدة عن المثالية المصطنعة وبكل فخر انا سبق وان اشتغلت محاسب ( كاشير ) في سوبر ماركت ( زاد للتموين الغذائي ) والحمد لله لم يكن من حاجه ولكن كنت انتظر الوظيفه الحكوميه بعد تركي للدراسه الجامعيه وبدل ما اجلس مكتوف الايدي مثل الاطفال او الحريم لا والله حتى الحريم بعضهن موظفات وتبي تصير اطيب مني .. قررت ان اشتغل محاسب لين تجي الوظيفه لاني استعيب جلوس الرجال في البيت وهو بصحته وعافيته . . هل ترضى لنفسك هذه التجربة اخي العضو بغض النظر عن حاجتك لراتب الوظيفة من عدمه ؟ نعم اوافق وقد اكون استعجلت وجاوبت في السؤال الاول و الان انا موظف حكومي في فترة الصباح حتى الضهر ومع ذلك لدي الرغبه في العمل فترة المساء بدل من اضاعة الوقت على الانترنت او التمشيه .. وذلك لاني شاب في مقتبل العمر وامامي متطلبات الحياة كثيره مثل ( الزواج و المنزل و .... الخ ) . . ولا ننسى ان رسولنا وحبيبنا صلى الله عليه وسلم كان راعي غنم وغيره من الانبياء كانوا يزاولون الحرف اليدويه مثل الخياطه وكذلك رعي الغنم لماذا لانقتدي بهم ونكون مسلمون اسما وفعلا .. لا ان نكون مسلمون بالاسم فقط !! . . هنا قد يسأل السائل بعد كلامي ويقول هل توافق ان تكون راعي غنم ؟ سأقول له غير تفكير مجتمعك الجاهل وابشر بالي يشتغل اي شغل شريف لاتشوبه الشبهات .. لكن مادام مجتمعنا جاهل لا والله سارفض قطعيا الرعي لاني عايش داخل المجتمع ومجبر على التماشي معه والانقياد له وذلك لان اليد الوحده ماتصفق .. متى مافهم المجتمع واقتنع ان العمل الشريف الذي لم يحرمه الشرع ليس عيبا على عيال القبايل تلك اللحظه انا اول من سيعمل اي عمل . . ولعلي اختتم كلامي بحديث الرسول صلى الله عليه وسلم : { لأن يأخذ أحدكم حبلا فيذهب فيأتي بحزمة من حطب على ظهره فيبيعها فيكف الله بها وجهه خير له من أن يسأل الناس شيئا أعطوه أو منعوه } . . اسف للاطاله واتمنى ان اكون وفقت في ابداء وجهة نظري وابداء رأيي بكل شفافيه وصراحه . دمتم بود

اخوي الخيل عشقي انا اشهد انك ما قصرت

من جد لقيت في ردك كل التساؤلات التي تدور في راسي

الله يشفي والدتك والله يرفعها بالعافيه والله يسهل ضروفك الشخصيه واحتسب الاجر في صبرك لتناله باذن الله

الله يجزاك الف خير يالغالي

اما اجباريه !!


لا حول ولا قوة الا بالله .. شيء محزن ان اسمع مثل هذا في بلاد الحرمين اثرنا غافلين عن اشياء كثيره

ايه والله هذا كلامه بالحرف الواحد


حتى انا الصراحة استغربت

لا حول ولا قوة الا بالله


ايجهلون قول النبي صلى الله عليه وسلم ( حفوا الشوارب واكرموا اللحى )

والله الصراحة انا يعني من ناحية الاكل فانا معهم الصراحة يعني علشان الاكل يعني ماله داعي القى شعرة في الاكل

بس انا ناقشته ما خليته قلت كيف احلق لحيتي مالك حق تامرني بهالشي

شف دكتور القلب الجبير اطول من لحيته مافيه وهو يشق قلوب الناس ما ضره بالعكس من افضل الاطباء السعودين


قال تقدر تغطيها <<< توهق

وبكل فخر انا سبق وان اشتغلت محاسب ( كاشير ) في سوبر ماركت ( زاد للتموين الغذائي )

ما شاء الله

ونعم والله

من جد هذي النوعية من الشباب السعودي التي نبحث عنها ونتمنى تطويرها

التي لا تعتمد على غيرها انما تعتمد على نفسها

سأقول له غير تفكير مجتمعك الجاهل وابشر بالي يشتغل اي شغل شريف لاتشوبه الشبهات .. لكن مادام مجتمعنا جاهل لا والله سارفض قطعيا الرعي لاني عايش داخل المجتمع ومجبر على التماشي معه والانقياد له وذلك لان اليد الوحده ماتصفق .. متى مافهم المجتمع واقتنع ان العمل الشريف الذي لم يحرمه الشرع ليس عيبا على عيال القبايل تلك اللحظه انا اول من سيعمل اي عمل

كلام سليم مية بالمية


بس في اعتقادي ان المجتمع ماراح يتغير كذا لحاله نحتاج شباب طموح ويحب التغيير يجبر المجتمع على تغير نظرته


واقرب مثال سيارات الاجرة


اول وييييييييييين جريمة ان سعودي يسوق لموزين ( في نظر المجتمع )


لكن لما اشتغل اكثر من سعودي في هذي الشغلة وجر بعضهم بعض اصبحت نظرة المتجتمع عادية بالنسبة للسعودي سواق اللموزين





اشكرك اخي الخيل عشقي على التكرم والمرور وابداء رايك الذي اضاف للموضوع اكبر فائدة من حيث ذكرك لتجربة شخصية مررت بها

بس في اعتقادي ان المجتمع ماراح يتغير كذا لحاله نحتاج شباب طموح ويحب التغيير يجبر المجتمع على تغير نظرته

الاجيال القادمه ان شاء الله بدوا يبتعدون عن الجهل والتعصب القبلي لكن لو الله يفكهم من تقليد الغرب في اللبس ( طيحني وارفعني ) وقصات الشعر والاحتفالات المشبوهه من اعياد و... الخ كان انهم بخير ان شاء الله


لكن مافيه محفزات لا من ناحية تشجيع ودافع معنوي ولا حتى دعم مادي .. المرتب الي ياخذونه ضئيل جدا مع انهم يكرفون كرف




ما اقول الا الله يكتب الي فيه الخير

موضوع جميـل ,,

لـي عـوده أخوي عبدالعزيز ,,

..

اخوي الخيل عشقي

الاجيال القادمه ان شاء الله بدوا يبتعدون عن الجهل والتعصب القبلي لكن لو الله يفكهم من تقليد الغرب في اللبس ( طيحني وارفعني ) وقصات الشعر والاحتفالات المشبوهه من اعياد و... الخ كان انهم بخير ان شاء الله

ايه من جد

لكن طيحني وما طيحني هذي شريحة بسيطة جدا من الشباب ولا الباقي فيهم الخير والبركة

لكن مافيه محفزات لا من ناحية تشجيع ودافع معنوي ولا حتى دعم مادي .. المرتب الي ياخذونه ضئيل جدا مع انهم يكرفون كرف

والله معليش اخوي

لكن من ناحية التشجيع بالعكس والله فيه تشجيع مهوب صاحي

يعني زي ماقلت لك

د.كيف على المقهى الي رحت له

هذي رواتبهم لا تقل عن 2500 وش تبي اكثر


و مكتبة جرير دوام خمس ساعات بس بمرتب 1800 ريال معقول



ومطعم ماكدونالاد رواتبهم حول 2000



من ناحية الدعم المادي ما عندك اي مشكلة

لكن الدعم المعنوي من قبل المجتمع هنا تكمن المشكلة


مشكور اخوي

هلا اختي سمى

موضوع جميـل ,,

لـي عـوده أخوي عبدالعزيز ,,

يحلو الموضوع بمشاركتك


في انتظارك اختي

استمعت بالنقاش معك اخوي الفاضل ابو ربيع واعجبني موضوعك لانه صفق صفق على الوتر الحساس مهوب دق وبس



ولي رجعه مابين الحين والاخر اشوف وش جديدكم


وان حصل فرصه للتدخل بالنقاش دحمنا معكم كان ماعندك مانع

وعليكم السـلام ورحمـة اللـه وبركاتـه ,,

..

كيف تنظر للسعودي الي يشتغل في مطعم او مقهى ؟؟ واتمنى ان الاجابة تكون بعيدة عن المثالية المصطنعة.

بكل صـدق .. في البدايـه بـ أشك إنه شيعي لا تستغربون لأنهم بصراحه ما شاء اللـه عليهم مكافحين لأبعد درجه ,,

وما يردهم شـيء أحسن الوظايف كلها شيعه .. وأحسن الشركات تعج بالشيعه .. وأحسـن الجامعات مليانه شيعه ,,

أقرب مثال قبل سنتين تقريبـاً متخرج واحد من أقاربي من جامعة البترول .. يقول وبدون مبالغه :

( كل الدفعه شيعـه إلا كم طالب ينعدون عـ الأصابـع .! ) ,,

ما شاء اللـه عليهم ما يهمـهم وين يشتغـل أهم شيء يلقى مصدر رزق وبس ,,

ياليت كل الشباب مثلهم > بالكـفـاح فقط ,,

> تحسـون قلبت الموضوع عـن الشيعـه ,’

المهـم .. نـرجـع لسؤالـك :

كيف تنظر للسعودي الي يشتغل في مطعم او مقهى ؟؟

صـراحـه ما أشوف فيهـا شيء .. يعنـي الشغلـه موب عيـب ولا تنقـص من قـدر الشخـص إلا بالعكـس ترفـعـه ,,

فيهـا اكتساب خبـره .. وتطوير للنفس وكيفيـة التواصل مع الآخرين بـ نفسياتهم وجنسياتهم وأطباعهم المختلفه ,,

وعـن نفسـي أعتبـره شخـص مكافـح .. واعـي .. عنـده قـدره على تحمـل المسؤوليـه .. يـدور رزقـه بالحـلال ,,

..

واختي العضوة كيف راح يكون شعورك لو دريتي ان اخوك يشتغل في د.كيف ولا كنتاكي

بالنسبـه لـي عـادي جـداً .. دام هـو راضـي عـن اللي يسويـه .. اللـه يوفقـه ,,

صحـيح المجتمـع موب مخليـه .. وردة فعـله ممكـن تسبب لـه ضغـوط نفسيـه .. لكـن لو فكـر إن اللي يسويـه

موب عيب ولا فيـه معصيـه للـه ورسـولـه .. أعتقـد بيهمـش رأي المجتمـع ويسوي اللي براسـه ,,

..

وهل تعتقدين انه ممكن ياثر عليك بعدين يعني يقولون الناس هذا والله اخوها قد شفته يشتغل في مقهى ولا مطعم مانيب خاطب منهم ؟؟

يمكـن يأثـر شوي من هـ الناحيـه .. لأن وزي ما قلت ( المجتمـع ما يساعـد !!! ) .. لكـن ما يسبب مشكلـه ,,

فيـه ناس واعيـه وفاهمـه وتعرف العيب وتميز بين الصح والخطأ ما تحكمهم ردة فعل المجتمع ولا

يهمهم كلام الناس .. أغلب مجتمعنا متعصب لأفكاره وعاداته وتقاليده [ السيء منها والحسن ] ,,

لا يرضـى بالأفكـار الدخيلـه حتـى لو كانت صائبـه ما يخلي أحـد فـي

حالـه .. وينتقـد كـل فعـل ما يعجبـه و حتى لو كان معجبه يكابـر ,,

..

وأذكـر أبيـات شعـر بليغـه .. تنطبق تماماً علـى مجتمعنـا :


ضحكت فقالوا ألا تحتشم ؟ّ! .. بكيت فقالوا ألا تبتسم ؟ّ!

بسمت فقالوا يرائــي بهــا ! .. عبست فقالوا بدا ما كتم .!

صمـت فقالوا كليـل اللسـان .. نطقت فقالوا كثير الكلم ,,

حلمت فقالـوا صنيـع الجبـان .. ولو كان مقتدراً لـ انتقم .!

بســلت فقـالوا لطيـش بهــا .. وما كان مجترئاً لو حكم ,,

..

مقهى في الخبر اسمه اكتوشي او شي زي كذا
كنت اروح له دايم واستغربت ان الموظف سعودي
سالته قلت هل عندكم وظايف قال اكيد وحنا ما نوظف الا سعودين

قلت اجل ما جاكم احد

قال بالعكس والله وكل موظفينا من جامعة البترول وجامعة فيصل
بس يقول الحين ما احد يجي من السعودين ومتوهقين


مع ان راتبهم 2500 ريال

طبعا بغيت اتوظف بس قال انك لازم تشغل اغاني في المقهى دايم لانها اجبارية

قلت سلام عليكم






رحت كنتاكي

قالي المصري اكيد نوظفك وراتبك اكثر من 2500 بس لازم تحلق لحيتك علشان الاكل

برضو قلت سلام عليكم

ما شاء اللـه عليـك أخوي .. احييك على هـ التجربـه .. ولو إنك ما كملتهـا .. لكـن يكفـي إنك حاولت ,,

واللـه يشفي أمك ويعافيهـا ,,

..

أختــم بهـذا البيت :


يقـولـون شـذ وإن قـلت لا ,,

وإمعـــةُ حــيـن وافقتهــم .!

فأيقـنـت أنـي مـهـمــا أرِد ..

رضـا الناس لا بد من أن أذم ,,

..


أعـذر عـ الإطالـه أخو عبدالعزيز .. لكـن شدّنـي الموضوع ,,

ألــف شكــر لـك ,’

يعطيكم الف عافية على التفاعل اخوي الخيل عشقي واختي سمى

ولي رجعة للتعقبي علىالردود



اختي سمى


احييك على ردك وصراحتك

وعليكم السلام ورحمة الله وبركاته ...


الله يعطيك العافيه اخوي ابوربيع على هالموضوع .. وليتك كل فتره تطرح لنا موضوع فيذا ..
واسمح لي اقول رأيي بكل صراحه بس اتوقع مهوب جايز لكم .. بس اهم شي مافيه تصنع وصريح وهذا الي انت طلبته ..

اولا : نظرة المجتمع لمن يعمل هذه الاعمال

المجـمتع مازال ينظر له نظره احتقار

ثانيا: تقبل الشاب للعمل في هذه الاماكن

ما اتوقع فيه تقبل يعني واحد موظف او طالب وبيروح يشتغل في مثل هالاماكن..؟؟
الحين الي عاطل وفعلا محتاج لمثل هالراتب مايرضى يشتغل في مثل هذي الاماكن (الا القليل) فما بالك بالي الله مغنيه ومو محتاج بيروح يشتغل..

كيف تنظر للسعودي الي يشتغل في مطعم او مقهى ؟؟

بصراحه ارحــمه واشفق عليه..لان بأعتقادي ما اشتغل هالشغله الا محتد.. ماكنت ادري ان فيه ناس تحب التجارب مثلك مشاءالله..
يعني من جد يكسر خاطر ولاودي اشوف سعوديين بمثل هالاماكن ..
غير اني مـستحيل اطلب منه شي مثلاً في كوفي او محل ملابس نسائيه..الخ استحي حس كأني اتأمر عليه ..

يعني يقولون الناس هذا والله اخوها قد شفته يشتغل في مقهى ولا مطعم مانيب خاطب منهم ؟؟

لااااااااا وش دخل اخوها هو بيتزوجها هي مو اخوها >>وهذا لو بحكي عنه يبي لنا نفتح موضوع ثاني
وما اشوفه شي مــعيب لها الدرجه بالعكــس .. اذا كان ما لقى وظيفه افضل له بدال جلست البيت مثل الحريم..
اما اذا كان موظف او طالب صراحه ما أأيد وش الله حاده بعد الواحد يدلع نفسه مهوب يكرف عمره ليل نهار ويقول كفاح ..
اما اذا كان قصده مصدر دخل ثاني او حاب يكون رأس مال ويخطط للمستقبل شي حلو بس مو بهذي الشغلات يقدر يسوي له اي مشروع اقلها محل جوالات وهذا المشروع ناجح بدرجه كبيره خلال السنوات الاخيره واتوقع مايبي له رأس مال كـبير..او اي شي ثاني..

بضرب لك مثال انا وحده مبدعه ولله الحمد بالميك أب لدرجة كثير شجعوني اشتغل في مشغل خصوصا اني ماعندي لادراسه ولاوظيفه يعني من جد وناسه..
واستمتع وان ارسم واتفنن على الوجيه يعني قمة الوناسه فبتصير بالدرجه اولى حاجه تشغلني واتسلى فيها هذا غير الربح المادي يعني الربح المادي شي ماتتخيله.. تصدق ان الميك أب اسعارهـ صارت توصل للأف والالفين..خصوصا اذا صارت سعوديه وموهوبه يرتفع معها السعر يعني لو بصلح 10 وجيه باليوم رح تكون عشر الالف .. بالشهر 30 الف واكثر..
لــكــن مافكرت نهائي لان بصراحه ما ارضاها لنفسي امكيج خلق الله واخذ فلوس احس حاجه مهينه بالنسبه لي يعني كأني شغاله او عامله فلبينيه..
وحتى لو فكرت اجرب يستحيل يرضون اهلي ومعهم حق..
مع اني احب ذا الهوايه وامارسها على وجيه خواتي وزميلاتي بس كوني اشتغل للناس بفلوس وبكيفهم وبأوامرهم لااااااا..يمكن اسويها لو كنت صاحبة المشغل وهو ملك لي مرح احس اني موظفه عند احد..


وبس هذا الي عندي والعذر طولت الحكي ..


والله يعطيك العافيه على هيك موضوع ..ويشفي الوالده ويعافيها من كل شر يارب ..


مشكور ..

اخوي الخيل عشقي

استمعت بالنقاش معك اخوي الفاضل ابو ربيع واعجبني موضوعك لانه صفق صفق على الوتر الحساس مهوب دق وبس

انا الي والله استمتعت بالنقاش معك اخوي

ومن جد انا ما كتبت هذا الموضوع الا انه شاغل بالي كثييير في الفترة الاخيرة

ولي رجعه مابين الحين والاخر اشوف وش جديدكم

اتوقع بعد رد ام سعد اكيد لك رجعة

اختي سمى اهنيك على ردك يالغالية

بكل صـدق .. في البدايـه بـ أشك إنه شيعي لا تستغربون لأنهم بصراحه ما شاء اللـه عليهم مكافحين لأبعد درجه ,,

من جد والله انا ملاحظ هالشيء


الله يستر بس من هالكفاح حقهم

( كل الدفعه شيعـه إلا كم طالب ينعدون عـ الأصابـع .! ) ,,

اتوقع تخصصه هندسة بترول على كذا

فيهـا اكتساب خبـره .. وتطوير للنفس وكيفيـة التواصل مع الآخرين بـ نفسياتهم وجنسياتهم وأطباعهم المختلفه ,,

من جد والله وانا ادور على وظيفة ان الراتب ما كان يهمني

كان يهمني اكتسب خبرة التواصل مع الاخرين

ضحكت فقالوا ألا تحتشم ؟ّ! .. بكيت فقالوا ألا تبتسم ؟ّ!

بسمت فقالوا يرائــي بهــا ! .. عبست فقالوا بدا ما كتم .!

صمـت فقالوا كليـل اللسـان .. نطقت فقالوا كثير الكلم ,,

حلمت فقالـوا صنيـع الجبـان .. ولو كان مقتدراً لـ انتقم .!

بســلت فقـالوا لطيـش بهــا .. وما كان مجترئاً لو حكم ,,

..

يا سلام يا اختي سمى من جد ابيات قمة في الروعة


بس متجمعنا ارحم من مجتمع هالشاعر

ما شاء اللـه عليـك أخوي .. احييك على هـ التجربـه .. ولو إنك ما كملتهـا .. لكـن يكفـي إنك حاولت ,,

واللـه يشفي أمك ويعافيهـا ,,

امين والله يجزاك الف خير


ووالله العظيم يوم رحت كنتاكي طار فيني المدير المصري طيرة مهيييب طبيعية

قال الي تبيه سوه داوم متى ما بغيت ومدري وشو وراتبك ماشي


قلت طيب ليش فازع لي مرة


قال يعني انت شاب سعودي ومن هالكلام


قلت ايه طيب


ما ادري وش وراه لكن والله ياهو من جد طاير فيني طيرة

يقـولـون شـذ وإن قـلت لا ,,

وإمعـــةُ حــيـن وافقتهــم .!

فأيقـنـت أنـي مـهـمــا أرِد ..

رضـا الناس لا بد من أن أذم ,,

احس هو نفس الشاعر الي فوق

لاعبن فيه مجتمعه لعب

أعـذر عـ الإطالـه أخو عبدالعزيز .. لكـن شدّنـي الموضوع ,,

ألــف شكــر لـك ,’

اتعتذرين عن درر سطرتيها

ما سمعنا بهذا في ملة الاولين يا سمى


من جد درر يا سمى ما قصرتي على الرد يعطيك العافية اختي

اهلا اختي ساراي

و اللـه موضوع رائع ، ،
خصوصاً في هذي الفتره الإنتقاليه في تغير فكر المجتمع السعودي .. و انتشار الثقافة و الوعي بين افراده ، ،

من جد احسها فترة انتقالية


يعني حاليا على سبيل المثال في مكتبة جرير اذا شفت عامل اجنبي استغرب

بالعادة كلهم سعودييين

ما اكذب عليك .. انا احترم و اقدر اللي يشتغلون .. حتى لو كان بمحطة بنزين ، ،
اهم شي يشتغل و يملأ وقته بدال الإستراحات و التسكع بالشوارع ، ،

من جد هذا ما نبحث عنه قتل وقت الفراغ خصوصا للشباب لان


إن الفراغ والشباب والجدة ... مفسدة للمرء أي مفسدة

ناس مكافحين من جد .. الصبح دراسـه .. و الليل يشتغل .. !
بعد 5 سنين اتوقع كل المرافق العامة و الشركات راح يمسكونها الشيعة .. و ربعنا قاعدين : ( ، ،

من جد والله الله يستر والله يا بنروح وطي لو صار الي تقولينه الله يستر بس

و فيه مثل يقول : لا شئ يأتي دون عناء سوى الفقر .. !

وااااااااااااااو


من جد مثل في الصميييييييم

احيك على اختيار المثل اختي ساراي



يعطيك الف عافية على المرور والرد ما قصرتي اختي

هلا والله يا ام سعد


بوجودك تحلو المناقشة

الله يعطيك العافيه اخوي ابوربيع على هالموضوع .. وليتك كل فتره تطرح لنا موضوع فيذا ..

يا مال العافية والله

وترانا نحتريك بعد تحطيلنا موضوع

واسمح لي اقول رأيي بكل صراحه بس اتوقع مهوب جايز لكم .. بس اهم شي مافيه تصنع وصريح وهذا الي انت طلبته ..

اكيد يا ام سعد هذا الي نبيه ونطمح له

المجـمتع مازال ينظر له نظره احتقار

والله ما ادري يا ام سعد الصراحة انا اعتقد ان النظرة هذي ولت

يعني في الامس القريب كانت هذي النظرة هي الموجودة صح

اما اليوم الصراحة بحكم اني رحت وشفت الي يشتغلون في الاماكن هذي وسولفت معهم وسمعت معهم

ما كانوا يشعرون بالنظرة هذي ابدا

ما اتوقع فيه تقبل يعني واحد موظف او طالب وبيروح يشتغل في مثل هالاماكن..؟؟

طبعا ليش لا يام سعد


وزي ما ذكرت في سالفة المقهى


انه يقول كل موضفينا طلاب جامعة البترول


وشفت صور للموظفين نصهم اعرفهم بالجامعة

بصراحه ارحــمه واشفق عليه..لان بأعتقادي ما اشتغل هالشغله الا محتد

مهوب شرط والله


كثير ناس ماخذينها تقضية وقت لا اكثر ولا اقل

يعني من جد يكسر خاطر ولاودي اشوف سعوديين بمثل هالاماكن ..

بالعكس والله يا ام سعد انا ودي اشوف السعودي في هذي الاماكن والله وفي كل الوظايف


لان راح تقل العمالة الاجنبية واذا قلت العمالة الاجنبية اكيد راح تقل الجرايم الي في البلد

لااااااااا وش دخل اخوها هو بيتزوجها هي مو اخوها

ما ادري صراحة لان المجتمع لو بينظر زي نظرتك وبيقول ان هذا محتد للوظيفو اجل اكيد اهله على قد حالهم

وشوله اخطب منهم واصرف عليهم

خصوصا في الفترة الحالية اصبح لسان حال المجتمع يقول : اظفر بذات المال

اما اذا كان موظف او طالب صراحه ما أأيد وش الله حاده بعد الواحد يدلع نفسه مهوب يكرف عمره ليل نهار ويقول كفاح

والله شبابنا لو يكرف ليل نهار يضل مدلع


لانه لو ما اشتغل

على قولة ساراي سهرات واستراحات وانت جاي

ضرب لك مثال انا وحده مبدعه ولله الحمد بالميك أب لدرجة كثير شجعوني اشتغل في مشغل خصوصا اني ماعندي لادراسه ولاوظيفه يعني من جد وناسه..

سبحان الله


توني اليوم افكر اقول لو فيه سعودية تعرف تمكيج ليه ما تسوي مثل هالمصريات واللبنانيات تمكيج العالم وما يحتاج هي تجيهم هم يجونها وممنونين بعد

وتشتهر ويجيها دخل خصوصا انها سعودية بيهبون فيها الحريم

ضرب لك مثال انا وحده مبدعه ولله الحمد بالميك أب لدرجة كثير شجعوني اشتغل في مشغل خصوصا اني ماعندي لادراسه ولاوظيفه يعني من جد وناسه..

سمعت انه ياصل 300 و500 يمكن عندكم في الرياض ياصل بالالاف


الله يعينكم اصبغ وجهي بـ 1000 ريال واغسله في نفس اليوم

لــكــن مافكرت نهائي لان بصراحه ما ارضاها لنفسي امكيج خلق الله واخذ فلوس احس حاجه مهينه بالنسبه لي يعني كأني شغاله او عامله فلبينيه..

ما ادري صراحة بس احس البنت مالها حرية بالشغل وما الشغل زي الولد <<< موضوع ثاني


بس اعتقد انك انتي مقتنعة برفض الفكرة


صراحة حرام يعني عندك موهبه ولا تستغلينها

وما فيها من الاهانة ميزان شعرة


الحمد لله اصلا تلقينك اتجر من الي بتمكيجينهن اذا راتبك 30000 بالشهر

يمكن اسويها لو كنت صاحبة المشغل وهو ملك لي مرح احس اني موظفه عند احد..

طيب هذا مشروع ممتاز

تجيبين لك كم سعودية وتعلمينهن المكيجة


مع اني احس ان الي تنقل بين البيوت تكون اكثر شهرة

وبس هذا الي عندي والعذر طولت الحكي ..

ردك اعتبره هدية

ولم اعلم احد الى الان يعتذر عند تقديم الهدية يام سعد

ويشفي الوالده ويعافيها من كل شر يارب ..

امين امين امين

كثروا الدعاء ياخوان








ام سعد من جد مشكورة على الرد


ما ادري ليه حسيت اني اخالفك في كل نقطة


ما قصرتي على الرد